د فراه ولایت د روغتیايي خدمتونو د پیاوړتیا لپاره د ۱۱۸ زره ډالرو په ارزښت تړون لاسلیک شو
د عامې روغتیا وزارت له لوري د فراه ولایت اوسېدونکو لپاره د روغتيايي خدمتونو پياوړتيا او پراختيا په موخه له Relief International مؤسسې سره د (۱۱۸،۰۷۹) یو سل اتلس زره او نهه اویا ډالرو په ارزښت تړون لاسليک شو
دا تړون د روغتيايي خدمتونو کيفيت لوړولو، لاسرسي زياتولو او د ولس روغتيايي ستونزو کمولو په موخه د یو کال لپاره لاسليک شو، چې له مخې به یې د فراه ولایت (۲۸۲۵۵) تنه اوسېدونکي له تغذیي خدماتو برخمن او (۲۴) تنو ته به په روغتیايي برخه کې د کار زمينه هم برابره شي.
بل لور، د Relief International مؤسسې استازو هم ډاډ څرګند کړ، چې ياده پروژه به د یو کال په ترڅ کې له ټولو ټاکل شويو معيارونو سره سمه پلي کړي او د خلکو روغتيايي اړتیاوو پوره کولو ته به ځانګړې پاملرنه کوي.
