نشست آگاهی‌دهی به‌منظور تأمین مصوونیت بیماران و ارائه مراقبت‌های بهتر از سوی وزارت صحت عامه برگزار شد

در این نشست، محترم مولوی عبدالولی حقانی، معین عرضه خدمات صحی وزارت صحت عامه، شماری از رئیسان مرکزی، مسئولان شفاخانه‌های مرکزی، نماینده سازمان صحی جهان و نماینده‌گان رسانه‌ها اشتراک داشتند. محترم معین عرضه خدمات صحی گفت که مصوونیت بیمار یکی از بخش‌های اساسی خدمات صحی باکیفیت است و تشخیص به‌موقع، تداوی لازم و محیط صحی معیاری در این زمینه ضروری می‌باشد.

همچنان، محترم عبدالولی حقانی گفت که مصوونیت بیماران تنها مسئولیت کارمندان صحی نیست، بلکه مسئولیت مشترک نهادهای ملی و بین‌المللی، سازمان‌ها، کارمندان صحی، جامعه، خانواده‌ها و بیماران است. وی افزود که یک نظام صحی منظم و نیرومند، داکتر متعهد و بیمار آگاه، سه رکن اساسی مصوونیت بیمار به شمار می‌روند.

از سوی‌هم، داکتر وحدت الکوزی، رئیس عمومی طب معالجوی وزارت صحت عامه، گفت که برای تأمین مصوونیت بیماران و ارائه تداوی بهتر، تشخیص معیاری، جلوگیری از آسیب‌های احتمالی هنگام تداوی و تطبیق ادویه بر اساس دوز تعیین‌شده ضروری است.

علاوه بر آن، داکتر محمد سمیع کریمی، مسئول جلوگیری و کنترول امراض غیرساری وزارت صحت عامه، و نماینده سازمان صحی جهان نیز در مورد جلوگیری از امراض غیرساری و مصوونیت بیماران سخنرانی نمودند.