په تخار ولایت کې یوه اندازه بې کیفیته او تاريخ تېر خوراکي توکي راټول او له منځه يوړل شول
دوشنبه، ثور ٢٦/ ۱۴۰۱
د تخار ولايت د عامې روغتيا رييس ډاکټر عبدالقهار احمدي په دغه ولايت کې د دوه نيم ټنه بې کيفيته او تاريخ تير خوراکي توکو د راټولولو خبر ورکړ.
د تخار د عامې روغتيا رييس زياته کړه، چې دغه خوراکي توکي د تالقان د ښار له بېلابېلو سيمو څخه د ولايت ، امنيه قوماندانۍ، اطلاعاتو او فرهنګ رياست، د تخار ښاروالۍ، چاپېريال ساتنې، صنعت او سوداګرۍ رياست په ګډون د بېلابېلو ادارو د استازو په شتون کې له منځه يوړل شول.
ډاکټر احمدي دغه راز وويل: په دغه ولايت کې د بې کيفيته او تاريخ تېرو خوراکي توکو د راټولولو لړۍ دوام لري او د دې ولايت له اوسېدونکو څخه مو غوښتنه ده چې د خوراکي توکو د پېرلو او د ټيټ کيفيته توکو د راټولولو پر مهال د عامې روغتيا له رياست سره همکاري وکړي.
