د عامې روغتیا وزیر د ختیځې مدیترانې حوزې له استازو، د قطر، سعودي عربستان او اماراتو له چارواکو سره د روغتیا د پیاوړتیا په تړاو آنلاین ناسته وکړه
د ا.ا.ا د عامې روغتیا وزیر، ښاغلي مولوي نور جلال جلالي په خپل کاري دفتر کې د روغتیا نړیوال سازمان د ختیځې مدیترانې حوزې له مشرې اغلې حنان البلخي، د قطر د روغتیا وزیر، د سعودي عربستان او متحده عربي اماراتو د روغتیا وزارتونو له استازو سره د روغتیایي سکټور د پیاوړتیا برخه کې پر یو شمېر مهمو موضوعاتو انلاین لیدنه ترسره کړه
په دې لیدنه کې چې د ختیځې مدیترانې حوزې د پولیو له منځه وړلو مسؤل ډاکټر حامد جعفري، د بیل ګیټس بنسټ استازو او نورو روغتیایي مسؤلینو هم شتون درلود، په کې د روغتیايي خدمتونو د پراختیا، د ساري ناروغیو او پولیو د مخنیوي، د پولیو واکسین د ښه تطبیق او د روغتیایي سیسټم سره د نړیوالو مرستو د جلب اړوند بحث او خبرې ترسره شوې.
د عامې روغتیا وزیر، د پولیو او ټولو ساري ناروغیو سره مبارزه د روغتیا وزارت لومړیتوب یاد کړ او ویې ویل، په دې برخه کې به لا ډېرې هڅې تر سره شي.
ښاغلي وزیر همداراز، د روغتیایي سیسټم د ځان بسیاینې او له داخلي بودجې څخه د خدماتو پراختیا یادونه وکړه او د بېړنیو او لنډ مهالو مرستو تر څنګ یې د انکشافي او پایښت لرونکو مرستو پر اړتیا او څرنګوالي خبرې ترسره او دا یې د روغتیایي سیسټم د پرمختګ لپاره اړینې وګڼلې.
بل لور د روغتیا نړیوال سازمان د ختیځې مدیترانې حوزې مشرې، اغلې حنان البلخي د افغانستان روغتیايي سکټور کې د اوسنیو تر سره کېدونکو هڅو قدرداني وکړه او دې برخې ته د نړیوالو مرستو د را جلبولو تر څنګ یې پر دوامدارو او بنیادي چارو ټینګار وکړ.
د یادې لیدنې په پای کې د قطر، سعودي عربستان او متحده عربي اماراتو د روغتیا وزارتونو استازو هم د افغانستان له روغتیایي سکټور سره د ملاتړ او د ساري ناروغیو سره په مبارزه کې د همکارۍ ژمنې وکړې.
