د عامې روغتیا وزارت له لوري د (۱.۸) میلیونه ډالرو په لګښت افغان جاپان او د انتاني ناروغیو درملنې روغتونونو کې د راډیولوژي دوه مجهز مرکزونه جوړ او پرانیسته یې تر سره شوه
په همدې موخه جوړو شویو مراسمو کې د عامې روغتیا وزیر ښاغلي مولوي نور جلال جلالي، د روغتیايي خدمتونو وړاندې کولو مرستیال ښاغلي مولوي عبدالولي حقاني، د مقام د دفتر لوی رئیس الحاج شیخ محمد طاهر حلیم، د وزارت یو شمېر مرکزي رئیسانو، د روغتیا نړیوال سازمان، بېلا بېلو ادارو او رسنیو استازو ګډون کړی و.
د عامې روغتیا وزیر، ښاغلي مولوي نور جلال جلالي د یادو مرکزونو په جوړېدو خوښي څرګنده کړه، دا چاره یې د روغتیایي برخې د پرمختګ په لور یو مهم ګام یاد کړ او ویې ویل: ( د هېواد روغتیايي سیسټم پیاوړتیا زموږ له مهمو لومړیتوبونو څخه ده او د دغو دوه پرمختللو راډیولوژي مرکزونو جوړول ستره لاسته راوړنه ګڼو، چې پر مټ به یې موږ وکولای شو د تشخیص له لارې د ناروغانو د ژوند ژغورلو سربېره د خلکو لپاره تشخیصیه برخه کې درانه مالي لګښتونه راکم کړو).
ښاغلي وزیر، د روغتیا نړیوال سازمان او جاپان هېواد څخه د مننې تر څنګ زیاته کړه، پیاوړی تشخیصیه سیسټم د دقیقې درملنې بنسټ جوړوي او دا مرکزونه به زموږ روغتیايي کارکوونکو ته د ناروغیو د دقیق تشخیص زمینه برابره کړي.
د یادونې وړ ده، یاد راډیولوژي مرکزونه د روغتیا نړیوال سازمان په همکارۍ د جاپان هېواد په مالي مرسته د (۱.۸) میلیونه ډالرو په لګښت جوړ شوي، چې دوه معیاري سي ټي سکن ماشینونه، دوه ډاپلر ماشینونه، د لمریزې برېښنا سیسټم او نورې اسانتیاوې لري او په مرسته به یې اړوندو ناروغانو ته معیاري تشخیصیه خدمات وړاندې کېږي.
