د عامې روغتیا وزارت د زندانونو د روغتیا امر په ننګرهار ولایت کې د تطبیق کوونکو مؤسسو استازو سره ولیدل
د عامې روغتیا وزارت د زندانونو د روغتیا امر په مشرۍ ننګرهار ولایت ته تللي پلاوي د دغه ولایت په زندانونو کې د روغتیايي خدمتونو پياوړتیا په موخه د تطبیق کوونکو مؤسسو استازو سره د عامې روغتیا رییس مولوي امین الله شریف په شتون کې ناسته ترسره کړه.
په دغه ناسته کې د عامې روغتیا وزارت د محبسونو د روغتیا امر ډاکټر کریم الله مهربان د زندانونو څخه د لیدنې او څارنې راپور وړاندې کړ او هم یې د عمومي او ماشومانو محبسونو لپاره د ساري ناروغیو د مخنیوي په موخه د درملو، پاکو اوبو او سیمه ییز روغتون کې د زندانیانو د ښې درملنې سپارښتنې وکړې.
یاده ناسته کې د تطبیق کوونکو موسسو استازو ډاډ څرګند کړ چې د عامې روغتیا وزارت د لایحې مطابق به محبسونو کې روغتیايي خدمات وړاندې کوي.
