د عامې روغتیا وزارت له لوري د ایډز نړیواله ورځ د یوې غونډې په ترڅ کې ونمانځل شوه
د عامې روغتیا وزارت د مالي او اداري چارو مرستیال ښاغلي مولوي محمد اسحق صاحبزاده د دې ورځې څخه د نمانځنې موخه د عامه پوهاوي لوړول، په ایډز ناروغۍ د اخته ناروغانو روغتیايي خدمتونو لاسرسی او په دې برخه کې د معلوماتو شریکول دي.
د مالي او اداري چارو مرستیال همدا راز وویل: ( د افغانستان اسلامي امارت د عامې روغتیا وزارت ژمن دی، چې ټولو هېوادوالو ته معیاري روغتیايي خدمتونه د هېواد په ټولو برخو کې وړاندې کړي او په دې برخه کې هڅې روانې دي.)
همدارنګه د ایډز نړیوالې ورځې اړوند د عامې روغتیا وزیر ښاغلي ډاکټر قلندر عباد پیغام ګډونوالو ته واورول شو، چې په هغه کې د دې ناروغۍ سره د مبارزې او مخنیوي په برخه کې د عامې روغتیا وزارت د فعالیتونو او د اخته کسانو روغتیايي وضعیت ته د رسېدنې په اړه یادونه شوې وه.
د یادونې وړ ده، چې د ساري ناروغیو د کنټرول رئیس، ډاکټر بسم الله، د ایډز ناروغۍ د کنټرول رئیس ډاکټر شریف احمد احمدزي، د ملګرو ملتونو د پرمختیايي ادارې استازې اغلې سوریو او د روغتیايي نړیوال سازمان استازي ډاکټر محمد اختر هر یو په خپل وار د یادې ورځې نمانځغونډې مراسمو ته وینا ترسره کړې
 |
