د روغتیايي کارکوونکو ظرفیت لوړونه او د اکمال تخصص برنامې ته د روغتيايي کارکوونکو جذب
عامې روغتیا وزارت په تېر يو کال کې د روغتیايي او اداري کارکوونکو د ظرفیت لوړونې لپاره مهم ګامونه اخیستي دي.
دغه هڅې د بشري سرچینو د مسلکي ودې، د تخصص کچې لوړولو او د معیاري روغتیايي خدمتونو وړاندې کولو په موخه ترسره شوې دي، چې په ترڅ کې له ۲۶ بېلابېلو تخصصي څانګو څخه نږدې ۵۰۰ تنه متخصصين فارغ شوي او د يادې برنامې د پراختیا په موخه ۱۰۰۰ تنه نوي ټریني ډاکتران جذب شوي، ترڅو د تخصصي خدماتو کچه لوړه او هېوادوالو ته معیاري خدمات وړاندې شي.
همداراز، په بېلابېلو روغتیايي او اداري برخو کې کارکوونکو ته پراخ ټرېنینګونه او ورکشاپونه ترسره شوي، چې په کې د زرګونو کارکوونکو مهارتونه لوړ شوي او د خدماتو کیفیت ښه شوی.
د يادونې وړ ده، د عامې روغتیا وزارت هڅه کوي، چې د معیاري او باکیفیته روغتیايي خدمتونو وړاندې کولو په موخه د هېواد دننه او بهر د افغان روغتیايي کارکوونکو لپاره د زده کړو، تخصصي ودې او ظرفیت لوړونې فرصتونه نور هم پراخ کړي.
