د غور ولایت د روغتیايي مرکزونو آمرينو لپاره د (IMNCI) تر عنوان لاندې شپږ ورځنی روزنیز ټريننګ تر سره شو
په همدې موخه جوړه شوې غونډه کې د غور ولایت د عامې روغتیا رئیس شیخ عبدالواحد حماس، په دغه ولايت کې د باران مؤسسې د دفتر رئیس ډاکتر محمد بارک او یو شمېر نورو مسؤلینو او روغتيايي کارکوونکو ګډون کړی و.
د غور د عامې روغتیا رئیس د روغتيايي کارکوونکو لپاره د ظرفیت لوړونې پروګرامونو د ترسره کولو له امله مننه وکړه او دا ډول روزنيز پروګرامونه یې د روغتیايي خدمتونو د کیفیت لوړولو او د خلکو لپاره د خدماتو وړاندې کولو په ښه والي کې یو مهم او اغېزمن ګام وباله.
هغه د غور ولایت اقتصادي وضعیت او ځانګړو چاپیریالي شرایطو ته په اشاره وویل، چې ګڼ شمېر هېوادوال د اقتصادي ستونزو له امله نه شي کولای خصوصي روغتیايي مرکزونو ته مراجعه وکړي، له همدې امله د خلکو غوښتنه او هیله له دولتي روغتیايي مرکزونو څخه ډېره لوړه ده او د معیاري خدماتو وړاندې کول د روغتيايي کارکوونکو لپاره یو اساسي مسئولیت ګڼل کېږي.
