د ننګرهار ولایت د روږدو درملنې ۱۷۰ بستریز روغتون کې د ۵۰ تنو روږدو ناروغانو د درملنې بشپړېدو او خپلو کورنیو ته د سپارلو په موخه غونډه ترسره شوه
په همدې موخه جوړو شویو مراسمو کې د عامې روغتیا وزارت د روږدو درملنې ملي برنامې رئیس الحافظ انعام الله عمار، د ننګرهار د عامې روغتیا رئیس مولوي امین الله شریف، د بېلا بېلو دولتي ادارو مسؤلینو، د روغتیايي بنسټونو امرینو، د تداوي شویو ناروغانو د کورنیو غړو او د یاد روغتون روغتیایي کارکوونکو ګډون کړی و.
د عامې روغتیا وزارت د روږدو درملنې ملي برنامې رئیس، الحافظ انعام الله عمار د غونډې ګډونوالو ته په خپله وینا کې د یاد روغتون له خدمتونو قدرداني وکړه، د روغتیايي کارکوونکو هڅې یې وستایلې او ګډونوال یې وهڅول چې له اسلامي امارت سره په ګډه د نشه یي توکو پر وړاندې مبارزه کې فعاله ونډه واخلي.
د ننګرهار د عامې روغتیا رئیس، مولوي امین الله شریف هم د غونډې په ترڅ کې د یاد روغتون د پرسونل پر ژمنتیا او غوره خدمتونو خوښي څرګنده او روغتیايي کارکوونکي یې د لا معیاري خدمتونو وړاندې کولو ته وهڅول.
