د عامې روغتیا وزارت د وینې ملي بانک له لوري د ننګرهار سیمه ییز روغتون د وینې بانک سره د ۳ میلیونه افغانیو په ارزښت د وسایلو او لابراتواري موادو مرسته وشوه
یاده مرسته چې د ننګرهار د عامې روغتیا رئیس، مولوي امین الله شریف په وړاندیز د عامې روغتیا وزارت د وینې مرکزي ملي بانک له لوري د ننګرهار سیمه ییز تخصصي روغتون د وینې بانک سره وشوه، پکې اړین وسایل او مواد شامل وو، چې په اړوندو برخو کې به اسانتیاوې رامنځته کړي.
د وینې بانک امر ډاکټر نور زاد خان وویل، په دغو وسایلو او موادو کې د وینې اخیستلو پاکټونه، Strip HB Meter، ټيوبونه، د وینې ګروپ معلومولو او د وینې څخه د پلازما او پلټيلیټ جدا کولو انټي سیرا، ډيف سنټرفیوژ او نور اړین مواد شامل دي، چې د اړتیا پر مهال به ترې لازمه ګټه اخیستل کېږي.
