ډاکتر نجیب الله ساحل د کندز ولایت د عامې روغتیا رئیس په توګه معرفي شو
پنجشنبه، سلواغه ٢٨/١٤٠٠
د عامې روغتیا وزارت د پالیسۍ او پلان مرستیال ډاکتر محمد حسن غیاثي کندوز ولایت ته د خپل سفر په ترڅ کې ډاکتر نجیب الله ساحل د دغه ولایت د عامې روغتیا د رئیس په توګه معرفي کړ.
د پالیسۍ او پلان مرستیال په ادارو کې تغیر او تبدیل یو اصل وباله او له ډاکتر ساحل څخه یې وغوښتل چې په دغه ولایت کې د روغتیايي خدمتونو وړاندې کولو د ښه والي او د اړمنو کسانو روغتیايي وضعیت ته د لاسرسي برخه کې لا زیاته پاملرنه وکړي.
دغه راز د پالیسۍ او پلان مرستیال د کندز د عامې روغتیا د پخواني رئیس قاري محمد انور بشیر له کارونو او هڅو څخه مننه او قدرداني وکړه او د لوی څښتن تعالی له دربار څخه ورته د لا زیاتو بریاوو هیله کوو.
له بلې خوا د عامې روغتيا وزارت د روغتیایي قوانینو د تطبیق رييس ډاکتر رسول منګل، د معالجوي طب عمومي رييس ډاکتر سیر پاڅون، د عامې روغتيا وزارت د ولايتي اړيکو او همغږۍ رييس ډاکتر عنايت الله عنايت کندز ولایت د سفر د هدف کاري برنامو په اړه خبرې وکړې او د کندز له نوي رئیس څخه یې وغوښتل چې په دغه ولایت کې د روغتیايي خدمتونو د کیفیت لوړولو د ښه کولو برخه کې لا زیاته پاملرنه وکړي.
