د عامې روغتیا وزارت له OPHA مؤسسې سره د ننګرهار او لغمان لپاره د روغتیايي خدماتو تړون لاسلیک کړ
د عامې روغتیا وزارت له لوري د ننګرهار او لغمان ولايتونو اوسېدونکو لپاره د روغتيايي خدمتونو پياوړتيا او پراختيا په موخه له OPHA مؤسسې سره د (۶۴۱۸۰۸) شپږ سوه یو څلوېښت زره اته سوه اته ډالرو په ارزښت تړون لاسليک شو:
دا تړون د یو کال لپاره لاسليک شو، چې له مخې به يې د ۹ بنسټیزو روغتیايي مرکزونو له لارې د ننګرهار او لغمان ولایتونو اوسېدونکو ته اساسي روغتیایي خدمات وړاندې کېږي.
ياد تړون د روغتيايي خدمتونو کيفيت لوړولو، لاسرسي زياتولو او د ولس روغتيايي ستونزو کمولو په موخه لاسليک شو، چې په پلي کېدو سره به یې د ننګرهار او لغمان ولایتونو (۱۱۳۶۰۰) تنه اوسېدونکي له اساسي روغتيایي خدماتو برخمن او ۹۰ تنو ته به په روغتیايي برخه کې د کار زمينه هم برابره شي.
بل لور، د OPHA مؤسسې استازو هم ډاډ څرګند کړ، چې ياده پروژه به د یو کال په ترڅ کې د ټولو ټاکل شويو معيارونو سره سمه پلي کړي او د خلکو روغتيايي اړتیاوو پوره کولو ته به ځانګړې پاملرنه کوي.
