د پکتیا او بامیان لپاره د روغتیايي خدمتونو د پیاوړتیا تړون له DAWEO مؤسسې سره لاسلیک شو
د عامې روغتیا وزارت له لوري د پکتیا او بامیان ولايتونو اوسېدونکو لپاره د روغتيايي خدمتونو پياوړتيا او پراختيا په موخه له DAWEO مؤسسې سره د (۱۴۵۰۴۸) یو سل پنځه څلوېښت زره او اته څلوېښت ډالرو په ارزښت تړون لاسليک شو:
دا تړون د یو کال لپاره لاسليک شو، چې له مخې به يې په بامیان ولایت کې د روږدو درملنې د دريو مرکزونو او پکتیا ولایت کې د دوو روغتیايي مرکزونو له لارې د دې ولايتونو اوسېدونکو ته د PSS (رواني او ټولنیز ملاتړ خدمتونه) وړاندې کېږي.
همدارنګه، د يادې پروژې په پلي کېدو سره به شاوخوا (۱۴) تنو ته د کار زمينه هم برابره شي.
د عامې روغتیا وزارت مسؤلينو وويل، ياد تړون د روغتيايي خدمتونو کيفيت لوړولو، لاسرسي زياتولو او د ولس روغتيايي ستونزو کمولو په موخه لاسليک شو، چې په پلي کېدو سره به یې د پکتیا او بامیان ولایتونو (۴۱۲۰) تنه اوسېدونکي د تغذيې اړوند خدماتو برخمن او ۱۴ تنو ته به په روغتیايي برخه کې د کار زمينه هم برابره شي.
بل لور، د DAWEO مؤسسې استازو هم ډاډ څرګند کړ، چې ياده پروژه به د یو کال په ترڅ کې د ټولو ټاکل شويو معيارونو سره سمه پلي کړي او د خلکو روغتيايي اړتیاوو پوره کولو ته به ځانګړې پاملرنه کوي.
