د عامې روغتیا وزارت له لورې د ژیړي (هیپاټیټیس) ناروغۍ پر وړاندې د مبارزې نړیواله ونماځل شوه
د افغانستان اسلامي امارات د عامې روغتیا وزارت له لورې د ژیړي (هیپاټیټیس) ناروغۍ پر وړاندې د مبارزې نړیواله ورځ (همدا اوس د عمل وخت دی) تر شعار لاندې د یوې سترې غونډې پرمهال ونمانځل شوه.
په دغو مراسمو کې د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني، د کورنیو او بهرنیو اداراتو استازو، د عامې روغتیا وزارت رئیسانو او د رسنیو استازو ګډون کړی وو.
د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني یادې غونډې ته د وینا پرمهال وویل: په افغانستان کې که څه هم د ژیړي ناروغۍ کچه د نورو هیوادونو په پرتله ټیټه ده؛ خو په خبره یې چې د اټکلونو له مخې په تېره لسېزه کې له سل زرو ډیر کسان په ژیړي (هیپاټیټیس) اخته شوي دي.
هغه زیاته کړه په تېر کال په افغانستان کې د دې ناروغۍ (۱۵۰۰۰) شاوخوا پېښو راپور ورکړل شوی دی، چې له دې جملې څخه ( ۱۲۰۰۰ ) د بي هیپاټیټیس ناروغان او (۱۳۰۰) د سي هیپاټیټیس ناروغان ثبت شوي دي.
ښاغلي حقاني دغه راز وویل چې روغتیا وزارت د دې ناروغۍ د مخنیوي لپاره د ژیړي او ایچ آی وي د ملي پروګرام په چوکاټ کې د ژيړي ناروغۍ د مخنیوي، درملنې او کنټرول په برخه کې په نشتو امکاناتو خپل ولس ته خدمات کوي، چې اوس مهال په ۱۴ ولایتونو کې د دې ناروغۍ د تشخیص او پیژندنې مرکزونه موجود دي او په اتو ولایتونو کې د درملنې خدمتونه تر سره کېږي، چې په نږدې راتلونکي کې به لسو نورو ولایتونو ته د دې ناروغۍ د درملنې خدمتونه ورسول شي.
