د عامې روغتیا وزیر په خپل کاري دفتر کې د پروان له والي، الحاج عبدالعلي قدرت الله امیني سره لیدنه ترسره کړه
په دې لیدنه کې په پروان ولایت کې د تطبیق کوونکو مؤسسو پر فعالیتونو، د روغتیايي سیستم پر پیاوړتیا، د دې ولایت اوسېدونکو ته د غوره روغتیايي خدمتونو پر وړاندې کېدو، د روغتونونو لپاره د طبي ماشینونو او د روغتیايي کارکوونکو د معاشاتو اړوند، بحث او خبرې ترسره شوې.
د عامې روغتیا وزیر، ښاغلي ډاکټر قلندر د روغتیايي سیستم پیاوړتیا له خپلو لومړیتوبونو وبلل " موږ هڅه کوو، چې د هېواد د ټولو سیمو وګړو ته په مساویانه ډول معیاري روغتیايي خدمات وړاندې کړو او په همدې موخه په تېرو دوو کلونو کې په هېواد کې ګڼ شمېر روغتیايي مرکزونو جوړ شوي او لا هم یاده لړۍ دوام لري.
ښاغلي وزیر همداراز زیاته کړه، د پروان ولایت روغتيايي خدمتونو ته به ځانګړې پاملرنه وکړي ، ترڅو د یاد ولایت ناروغانو د تشخیص په برخه کې لا اسانتیا رامنځته او غوره درملنه یې تر سره شي.
له بل لوري د پروان والي د عامې روغتیا وزارت له مشرتابه څخه دې ولایت ته د هغې د ځانګړې پاملرنې په موخه مننه وکړه او د هېواد د روغتیايي سیستم د پیاوړتیا په برخه کې یې د نوموړي هڅې وستایلې
