وزارت صحت‌عامه ا.ا.افغانستان نشست آگاهی‌دهی عامه و مبارزه با بیماری هپاتیت را تحت شعار «ادغام خدمات وقایوی و مراقبت از هپاتیت در سیستم صحی» برگزار کرد
در نشستی که به این مناسبت برگزار شد، محترم مولوی عبدالولی حقانی، معین عرضه خدمات صحی، شماری از رئیسان مرکزی این وزارت، نماینده‌گان سازمان‌های بین‌المللی و رسانه‌ها اشتراک داشتند.
در این نشست محترم مولوی عبدالولی حقانی گفت: که جلوگیری از هپاتیت از طریق تشخیص به‌موقع، تطبیق واکسین، تداوی معیاری و آگاهی‌دهی عامه امکان‌پذیر است. وی افزود که وزارت صحت‌عامه خدمات جلوگیری و تداوی هپاتیت را در شماری از ولایت‌های کشور گسترش داده و از همکاری سازمان‌های بین‌المللی، ادارات امارتی و رسانه‌ها در بخش جلوگیری، تشخیص و تداوی بیماری‌های ساری ابراز قدردانی می نماید.
همچنان، داکتر حیدر خان حیدر، رئیس عمومی طب وقایوی و داکتر عبدالرحمن شیرین‌دل، آمر پروگرام ملی کنترول ایدز، بیماری‌های مقاربتی و هپاتیت، گفتند: که جلوگیری از بیماری‌ها و تطبیق تدابیر وقایوی از اولویت‌های اساسی وزارت صحت‌عامه است. آنان افزودند که خدمات تشخیصی، وقایه و تداوی هپاتیت از ۱۲ ولایت به ۲۳ ولایت گسترش یافته و تلاش‌ها برای توسعه بیشتر این خدمات، با همکاری شرکایی ملی و بین‌المللی، به‌منظور افزایش دسترسی مردم به خدمات صحی در سراسر کشور ادامه دارد.
