د عامې روغتیا وزارت په علاءالدین پارک کې د نشهیي توکو د مخنیوي او عامه پوهاوي پروګرام ترسره کړ
د نشهیي توکو د ناوړه پایلو په اړه د ښاریانو د عامه پوهاوي کچې لوړولو او په عامه ځایونو کې د دې پدیدې د پراختیا مخنیوي په موخه علاءالدین پارک کې د نشهیي توکو د کارونې مخنیوي او عامه پوهاوي پروګرام ترسره شو
دغه پروګرام چې د یو شمېر ښاریانو، ځوانانو، د سیمې مخورو او اړوندو مسؤلینو په شتون کې ترسره شو، په ترڅ کې یې ګډونوالو ته د نشهیي توکو د کاروني مخنیوي لارو چارو، د نشهیي توکو ډولونو، د روږدیتوب لاملونو او د روغتیايي، ټولنیزو او اقتصادي زیانونو په اړه لازم معلومات وړاندې شول. سربېره پر دې، د روږدیتوب مخنیوي او د زیانمنو کسانو ملاتړ برخه کې د کورنیو، ښوونیزو بنسټونو او ټولنې پر رول هم ټینګار وشو.
د عامې روغتیا وزارت د روږدو درملنې ملي پروګرام د نشهیي توکو د کارونې مخنیوي ټیم څرګنده کړه، چې پر نشهیي توکو روږدیتوب د ټولنې له مهمو ستونزو څخه دی او پر وړاندې یې مبارزه د خلکو او مسؤلو ادارو هر اړخیزې همکارۍ ته اړتیا لري.
په پای کې، د عامه پوهاوي بروشورونه او معلوماتي مواد پر ګډونوالو ووېشل شول او په نورو عامه ځایونو کې د ورته پروګرامونو پر دوام او پراختیا هم ټینګار تر سره شو.
