د ا.ا.ا. د عامې روغتیا وزارت له لوري د نړیوال روغتیايي پوښښ غونډه د «سالم نسل، سالم راتلونکی، سالم اقتصاد» تر شعار لاندې ترسره شوه
په دې غونډه کې د روغتیايي پراختیا او پالیسۍ مرستیال ښاغلي ډاکټر محمد حسن غیاثي، د مقام د دفتر لوی رئیس الحاج شیخ محمد طاهر حلیم، د پلان او پالیسۍ لوی رئیس ډاکټر سید رسول منګل، د دې وزارت یو شمېر مرکزي رئیسانو، د روغتیا نړیوال سازمان (WHO)، یونیسف ادارې او رسنیو استازو ګډون کړی و.
په دې غونډه کې ښاغلي ډاکټر محمد حسن غیاثي وویل: (عامې روغتیا وزارت د روغتیايي عدالت د تأمین، د روغتیايي سکتور د پیاوړتیا او د بې وزلو قشرونو د ملاتړ په موخه خلکو ته روغتیايي خدمتونه وړاندې کوي، چې په همدي موخه په تېرو څلورو کلونو کې د هېواد په بېلا بېلو سیمو کې له ۴۰۰ څخه زیات روغتیايي مرکزونه جوړ شوي دي، نوموړي ټینګار وکړ، چې دغه وزارت به په راتلونکي کې هم د خلکو د روغتیا ساتنې او د روغتیايي خدمتونو د ښهوالي په موخه خپلې هڅې روانې ساتي).
همدارنګه، د مقام د دفتر لوی رئیس، الحاج شیخ محمد طاهر حلیم د «سالم نسل، سالم راتلونکی، سالم اقتصاد» شعار د ارزښت او موخې پر اهمیت ټینګار وکړ او ویې ویل، چې دې موخې ته رسېدل د ټولو ټولنو ګډو هڅو ته اړتیا لري. هغه زیاته کړه چې افغانان د نړۍ د نورو ملتونو پرتله د روغتیا په برخه کې لا زیاتې همکارۍ او ملاتړ ته اړتیا لري.
دغه راز، ډاکټر سید رسول منګل څرګنده کړه، چې د روغتیايي خدمتونو د پراختیا لپاره مشخصې لارې چارې او اقدامات د وزارت په پالیسیو او ستراتیژیو کې شامل شوي، چې دا اقدامات په جدي ډول د تطبیق په حال کې دي.
سربېره پر دې، د عامې روغتیا وزارت د اقتصاد او تمویل رئیس، ډاکټر میرویس احمدزي وویل، د اسلامي امارت له واکمنېدو وروسته روغتیايي خدمتونه پراخ شوي، بودجه کال په کال زیاته شوې او د روغتیايي خدمتونو د پراختیا او ښهوالي لپاره د رهبرۍ ژمنتیا هم موجوده ده.
د دې غونډې په پای کې د روغتیا نړیوال سازمان او یونیسف ادارې استازو د روغتیايي وضعیت په اړه ویناوې وکړې او د ګډو همکاریو پر اهمیت یې د ټینګار ترڅنګ د عامې روغتیا وزارت سره د خپلو همکاریو او ملاتړ د دوام ډاډ ورکړ.
