کاپیسا ولایت کې له یو شمېر درملتونونو او د خوراکي پلورنځیو څخه ۲۱۲۲ کیلو ګرامه له نېټې تېر خوراکي توکي او درمل راټول او له منځه یووړل شول
د کاپيسا ولایت د عامې روغتيا رياست د څارنې او پلټنې امریت مسؤلینو د خپلو نظارتي فعاليتونو په لړ کې د یاد ولايت اوه ولسواليو کې د خوراکي توکو پلورنځیو او درملتونونو څخه ۷۷ قلمه له نېټې تېر او بې کیفیته خوراکي توکي، چې (۱۹۴۵) کيلو ګرامه کېږي او ۶۵۷ قلمه له نېټې تېر او غير مجاز درمل، چې (۱۷۷) کيلو ګرامه کېږي، د ۱۴۰۴ هجري لمريز کال په لومړيو درېو مياشتو کې راټول کړي وو، له منځه یې یووړل.
یاد له نېټې تېر خوراکي توکي او درمل د يوې ګډې کمېټې، د اړوندو ادارو د استازو او څارنې او پلټنې امریت مسؤلینو په حضور کې د کاپيسا ولايت مرکز دشت شريزار سيمه کې د کثافاتو د له منځه وړلو لپاره ځانګړې شوې سيمه کې له منځه یووړل شول.
همداراز، د خوراکي توکو د پلورنځیو او درملتونونو مالکانو ته لازمې سپارښتنې وشوې، چې د نېټې تېرو او غير مجاز درملو او خوراکي توکو له پلور څخه ډډه وکړي.
