له مرکز وروسته په ولایتونو کې هم له خصوصي روغتونونو څخه د نظارت لړۍ پیل شوه
د نظارت یاده لړۍ د عامې روغتیا وزارت د طبي شورا لوی رئیس، ډاکټر فقیر محمد زیار په مشرۍ د یوې باصلاحیته کمېټې له لوري پیل شوې ده، چې موخه یې د هېواد په خصوصي روغتیايي مرکزونو کې د بهرنیو او داخلي ډاکټرانو، نرسانو او نورو روغتیایي کارکوونکو شتون، د فعالیت تنظیم، تحصیلي اسنادو، جوازونو او د اقامت سندونو څېړل دي، چې د سرغړونو په صورت کې به قانوني اقدامات تر سره کېږي
د دې نظارتي لړۍ په ترڅ کې دا ځل د عامې روغتیا وزارت د طبي شورا لوی رئیس، ډاکټر فقیر محمد زیار ننګرهار ولایت ته سفر تر سره او د ننګرهار د عامې روغتیا رئیس، الحاج مولوي امین الله شریف سره یې لیدنه وکړه.
د طبي شورا لوی رئیس وویل: د وزارت مقام د لارښوونې په اساس یې په ټول هېواد کې د خصوصي او دولتي روغتونونو ترڅنګ د بهرنیو ډاکټرانو څارنه پيل کړېده، چې په همدې لړ کې غواړي ننګرهار کې هم خصوصي او دولتي روغتونونو سربېره دې ولایت کې د بهرنیو ډاکټرانو فعالیت او اسناد هم وڅاري، هغه زیاته کړه چې دا چاره په کابل او بامیان ولایتونو کې په بریالۍ توګه ترسره شوه.
د ننګرهار عامې روغتیا رئیس، د طبي شورا لوی رئیس او مل پلاوي راتګ ته هرکلی وکړ او هیله یې وښوده چې د یادې څارنې پایله کې به د خصوصي او دولتي سکتورونو په خدماتو کې ښه والی رامنځته شي.
د یادونې وړ ده، چې د یاد نظارت په ترڅ کې به د ننګرهار ولایت له ټولو دولتي او خصوصي روغتونونو خدماتي بهیر ولیدل شي، د بهرنیو او داخلي ډاکټرانو، نرسانو او نورو روغتیایي کارکوونکو شتون، د فعالیت تنظیم، تحصیلي اسناد، جوازونه او د اقامت سندونه به وڅېړل شي او د سرغړونو په صورت کې به قانوني اقدامات تر سره کېږي.
