له روږديتوب څخه ۳۷ درملنه شوي کسان له درې مياشتني مسلکي زدهکړو وروسته فارغ شول
ياد کسان چې د فراه ولايت د عامې روغتيا ریاست اړوند په ۸۰ بستريز روغتون کې تر درملنې لاندې وو، د YHDO مؤسسې له لوري د درې مياشتني مسلکي روزنيز پروګرام له بشپړېدو وروسته، فارغ شول.
د فراه ولايت د عامې روغتيا رئيس، مولوي شيخ مير صدام د یادو کسانو فراغت غونډه کې هغوی ته د فراغت مبارکي ورکړه او د YHDO مؤسسې له خدماتو څخه یې د مننې تر څنګ وويل: «اوس تاسې نه يوازې روغ ياست، بلکې مسلکي کسان هم ياست؛ که خلکو تاسې پخوا روږدي بللئ، نو اوس بايد ټولنه تاسې د نلدوان، مستري او تخنيکي کارپوهانو په توګه وپېژني.»
همدارنګه، ښاغلي رئیس له خلکو وغوښتل، چې یادو کسانو ته درناوی وکړي او هغوی ته د يو مسلکي او ماهر شخص په سترګه وګوري.
دمګړۍ، ۴۰ تنه نور روږدي کسان هم د یاد مرکز په دويم پړاو کې په حرفوي زدهکړو بوخت دي او دوی ته هم ورته مسلکي پروګرامونه وړاندې کېږي.
