د غزني د سیمهییز روغتون د نیمه پاتې رغنیزو چارو د ژر ترسراوي په موخه د عامې روغتیا وزیر او د ملي پراختیا شرکت د رئیس ترمنځ ناسته
د ا.ا.ا د عامې روغتيا وزير، ښاغلي مولوي نور جلال جلالي په خپل کاري دفتر کې د ملي پراختيا شرکت له رئيس ښاغلي عبدالرحمن عطاش سره د غزني ولايت سیمه ییز روغتون د نيمه پاتې رغنیزو چارو ژر ترسراوي په موخه ليدنه وکړه
په دې ليدنه کې چې د عامې روغتیا وزارت د مالي او اداري چارو مرستيال ښاغلي قاري عبدالولي صديقي، د غزني د عامې روغتيا رئيس او يو شمېر نورو مسؤلینو هم شتون درلود، د غزني ولايت سیمه روغتون د نيمه پاتې چارو د ژر تر سراوي اړوند بحث او خبرې تر سره شوې.
د عامې روغتيا وزير، ښاغلي مولوي نور جلال جلالي وویل، د ياد روغتون پاتې چارو ژر بشپړېدل به د غزني ولایت اوسېدونکو ته د روغتیايي خدمتونو د وړاندې کولو بهیر لا پیاوړی او اسانتیاوې به پراخې کړي.
همداراز، په دې ناسته کې د ځينو نورو هغو نيمه پاتې روغتيايي پروژو او تعميراتو په اړه، چې د ملي پراختيا شرکت له لوري یې کارونه تر سره کېږي، د چارو د چټکتيا، ښه والي او شفافیت اړوند هم خبرې تر سره شوې.
دغه راز، د ملي پراختيا شرکت رئيس ډاډ ورکړ، چې د یادو پروژو د چارو منظم ترسراوي او پر وخت بشپړېدو لپاره به لا هڅې تر سره کوي.
