د عامې روغتیا وزارت د پلان او پالیسۍ ریاست له لوري د جمهوریت روغتون د ریفورم په موخه ناسته ترسره شوه
ياده ناسته کې د عامې روغتیا وزارت د پلان او پالیسۍ عمومي رئیس، ډاکټر میرویس احمدزي، د جمهوریت روغتون د منظمو روغتیايي چارو پر مخ وړولو لپاره د جوړې شوې کمېټې مشر، ډاکټر ایمل وردګ او د دې روغتون د ریفورم په برخه کې اړوند مسؤلینو شتون درلود.
په دې ناسته کې د جمهوریت روغتون د ریفورم په برخه کې د اړتیا وړ په بېلا بېلو طبي ماشینونو او تجهیزاتو د یاد روغتون پر سمبالولو، د نویو روغتیايي څانګو د فعالولو لپاره د ځای پر ځانګړي کولو، د روغتون د غوره مدیریت لپاره د نویو کسانو پر ګمارنو او ورته نورو موضوعاتو بحث او خبرې ترسره شوې.
د دې ناستې په پایله کې پرېکړه وشوه؛ تر څو د روغتون د مدیریت په برخه کې د نویو کسانو د ګمارنو تر څنګ په راتلونکو څو ورځو کې د دې روغتون د ریفورم په برخه کې په پورتنیو ذکر شوو موضوعاتو په عملي توګه کار پیل شي.
