د عامې روغتیا وزارت د خوړو او درملو مرستیال، ښاغلي مولوي حمدالله زاهد فراه ته د سفر په ترڅ کې د دغه ولایت له والي سره په ابو نصر فراهي بندر کې د خوړو او درملو اړوند ستونزو حل په موخه ناسته ترسره کړه
په دې ناسته کې، چې ښاغلي مولوي حمدالله زاهد، مل پلاوي، د فراه والي ملا محمد حافظ مجاهد، د عامې روغتیا رئیس، یو شمېر نورو مسؤلینو او تجارنو هم ګډون درلود، په ابو نصر فراهي بندر کې د خوړو او درملو اړوند ستونزو حل په موخه بحث او خبرې ترسره شوې.
د عامې روغتیا وزارت د خوړو او درملو مرستیال ګډونوالو ته د خوړو او درملو د ارزونې او کنټرول معیارونه تشریح کړل او ویې ویل، چې دغه معیارونه د امیرالمؤمنین حفظهالله تعالی د فرمانونو او عامې روغتیا وزارت د طرزالعملونو پر بنسټ ترتیب شوي دي.
همداراز، ښاغلي مرستیال زیاته کړه، عامې روغتیا وزارت هڅه کوي، څو خلکو ته سالم، معیاري او باکیفیته خواړه او درمل وړاندې کړي.
همدارنګه، د فراه والي وویل، په دې برخه کې به هېڅ ډول غفلت نه ترسره کېږي، ځکه د امیرالمؤمنین فرمان او نافذ قانون دی او د دغه تطبیق پر ټولو لازم او واجب دی.
د یادونې وړ ده، چې د خوړو او درملو مرستیال د شيخ ابو نصر فراهي بندر څخه له نږدې لیدنه وکړه او اړوندو مسؤلینو ته یې د چارو لا ښه ترسراوي سپارښتنې وکړې.
