د عامې روغتیا وزارت د املاکو مرکزي او ولایتي مدیرانو ته د املاکو ساتنې، اسنادو ثبت او تثبیت په موخه روزنیز سیمینار ترسره شو
دغه سیمینار د عامې روغتیا وزارت اړوندو املاکو مرکزي او ولایتي مدیرانو ته د هېواد د مرکز په ګډون ۳۴ ولایتونو کې د یاد وزارت د املاکو تثبیت او د مالیې وزارت د املاکو ریاست په ډیټابیس کې یې د اسنادو ثبت په موخه ترسره شو، چې موخه یې د املاکو د ثبت فورم دقیقه زده کړه او عملي کول، په ولایتي کچه د راپور ورکولو یو واحد سیستم رامنځته کول، د عامې روغتیا وزارت د ملکیتونو د ضایع کېدو مخنیوی او د املاکو د رسمي اسنادو ساتنه او د تثبیت او ثبت پروسې چټکتیا ده.
په یاد سیمینار کې د عامې روغتیا وزارت د مالي او اداري چارو مرستیال ښاغلي قاري عبدالولي صدیقي، د پلان ګذارۍ او برنامه ریزۍ رئیس ډاکټر عبدالستار صحت، د اداري ریاست مسؤلینو او کارکوونکو ګډون کړی ؤ.
د عامې روغتیا وزارت د مالي او اداري چارو مرستیال، ښاغلي قاري عبدالولي صدیقي د املاکو په ښه حفاظت، د اسنادو پر برابرولو او ثبت ټنیګار وکړ او زیاته یې کړه، چې له املاکو څخه باید په لازمه او اغېزمنه توګه ګټه واخیستل شي او قراردادونه یې هم باید په معقول او منطقي ډول ترسره شي؛ ترڅو د غصب او ستونزو پېښېدو مخه ونیول شی.
د یادونې وړ ده، دغه سیمینار د عامې روغتیا وزارت د مالي او اداري چارو معینیت اړوند اداري ریاست له لوري ترتیب شوی و، چې اړوند موضوعات ورکې ګډونوالو ته تشریح شول.
