د افغانستان اسلامي امارت د عامی روغتیا وزیر، ښاغلي ډاکټر قلندر عباد په افغانستان کې د روغتیا نړیوال سازمان مشر ډاکټر ډاپینګ سره ناسته ترسره کړه
په دی ناسته کې د عامې روغتیا وزیر، ښاغلي ډاکټر قلندر عباد د هېواد په نیږدې او لرې پرتو سیمو کې هېوادوالو ته د معیاري روغتیايي خدمتونو وړاندې کولو ته په اشارې وویل، د افغانستان اسلامي امارت له واکمنېدو راپدېخوا ټولو هېوادوال اوسمهال له معیاري روغتیايي خدمتونو برخمن دي او ولسونو ته په وخت د معیاري روغتیايي خدمتونو وړاندې کول زموږ مسئولیت دی، چې د تېر په پرتله په روغتیايي خدمتونو کې د پام وړ بدلون راغلی او ولس په خپلو روغتیايي کارکوونکو او روغتیايي خدمتونو باور پیدا کړی دی.
د میندو او ماشومانو روغتیايي وضعیت د تېر په پرتله ډېر ښه شوی، د ساري ناروغیو د مخنیوي په برخه کې د پام وړ کار شوی دی او د نورو برخو ترڅنګ د واکسین د تطبیق په برخه کې زیات پرمختګ شوی دی، چې دا ټول د افغانستان اسلامي امارت د عامې روغتیا وزارت او د کورنیو او بهرنیو همکارانو د ژمنتیا او زیار پایله ده.
ډاکټر ډاپینګ چې د شاوخوا درېو کلونو را پدېخوا په افغانستان کې د روغتیا نړیوال سازمان مشر پاتې شوی دی د عامې روغتیا وزیر له غوره رهبرۍ او په روغتیايي برخه کې د لاسته راوړنو ستاینه وکړه او ویې ویل چې تل به هڅه کې وي؛ تر څو د افغانستان د روغتیايي سیستم سره همکار و اوسي.
په پای کې د عامې روغتیا ښاغلي وزیر د روغتیا په برخه کی د روغتیا نړیوال سازمان د مشر ترسره شوي فعالیتونه او هڅې وستایلې او د الله تعالی له دربار څخه یې په نوي دنده کې د بریالیتوب هیله څرګنده کړه.
