خوست ولایت کې د یو شمیر روغتیایي مرکزونو د رغنیزو چارو پرانیسته تر سره شوه
د ا.ا.ا. د عامې روغتیا وزارت روغتیایي خدمتونو وړاندې کولو مرستیال، ښاغلي مولوي عبدالولي حقاني خوست ولایت ته د سفر پرمهال دې ولایت کې د نږدې اووه میلیونه افغانیو په ارزښت د څلورو نیمه پاتې روغتیایي مرکزونو د رغنیزو چارو پرانیسته ترسره کړه.
په همدې موخه جوړو شویو مراسمو کې د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني وویل:(د امیرالمؤمنین حفظه الله په ځانګړې لورینې ټول هېواد کې ۱۷۴ نیمه پاتې روغتیایي پروژو لپاره ۴ میلیارده ۵۵۶ میلیونه افغانۍ بودیجه ځانګړې شوې، چې عملي چارې یې له خوست ولایت څخه پیل شوې).
ښاغلي مرستیال زیاته کړه، د دغو نیمه پاتې پروژو څخه به یې څلور په خوست او پنځه په ننګرهار کې د روان کال تر پای بشپړې شي او پاتې نورې به یې په راتلونکو دوو کلونو کې پاې ته ورسېږي.
د یادو روغتیایي مرکزونو د رغنیزو چارو له تکملېدو وروسته ورته طبي وسایل او مسلکي پرسونل په پام کې نیول شوی چې ورسره به ټول هېواد کې روغتیایي خدمات لا پراخ او د خلکو د لاس رسي کچه به زیات شي.
