د کنړ ولایت په ماڼوګي ولسوالۍ کې یو روغتیایي مرکز پرانیستل شو
د افغانستان اسلامي امارت د عامې روغتیا وزیر ښاغلي، مولوي نور جلال جلالي له لوري د کونړ ولایت ماڼوګي ولسوالۍ لیچلام سیمه کې د درویشت نیم میلیونه افغانیو په مالي لګښت د یو روغتیایي مرکز پرانیسته ترسره شوه.
دغه روغتیایي مرکز چې د کډوالو په چارو کې د ملګرو ملتونو نړیوالې ادارې (UNHCR) په همکارۍ تر جوړېدو وروسته ګټې اخیستنې ته وسپارل شو.
په همدې موخه جوړو شویو مراسمو کې د عامې روغتیا وزیر ښاغلي، مولوي نور جلال جلالي، د مخابراتو او معلوماتي ټیکنالوجۍ وزیر مولوي نجیب الله حیات حقاني د عامې روغتیا وزارت یو شمېر مرکزي رئیسانو، د کونړ والي قدرت الله ابو حمزه، امنیه قومندان ضیاءالحق د عامې روغتیا رييس قاري مظفر خان مخلص، قومي مخورو، مسئولینو او روغتیایي کارکوونکو ګډون کړی و.
په دې جوړو شویو مراسمو کې د عامې روغتیا وزیر ښاغلي، مولوي نورجلال جلالي لیچلام سیمه کې د یاد روغتیایي مرکز په جوړېدو خوښي وښوده او په روغتیایي برخه کې یې د یادې سیمې خلکو لپاره یوه لویه لاسته راوړنه وبلله.
ښاغلي مولوي نور جلال جلالي وویل: د هېواد لرې پرتو سیمو کې د خلکو روغتیایي ستونزو د حل په موخه یې د روغتیایي مرکزونو د جوړېدو هڅې پیل کړي چې ښه بېلګه یې د لېچه لام سیمه کې د یو روغتیایي مرکز جوړېدل دي.
د کونړ قومي مشرانو او مسئولینو د عامې روغتیا وزارت او په ځانګړې توګه له ښاغلي مولوي نورجلال جلالي څخه مننه وکړه چې د یاد روغتیایي مرکز جوړولو کې د عامې روغتیا وزارت خپلې هڅې نه دي درېغ کړي او زیاته یې کړه چې د دغه روغتیایي مرکز جوړېدو سره به زرګونه خلک له روغتیایي اسانتیاوو برخمن شي.
