د عامې روغتیا وزیر د بیلاروس له نوي ټاکل شوي غیرمقیم سفیر سره لیدنه وکړه
د افغانستان اسلامي امارت د عامې روغتیا وزیر ښاغلي مولوي نور جلال جلالي د افغانستان لپاره د بیلاروس هېواد نوي ټاکل شوي غیرمقیم سفیر، ښاغلي السکاندر سریګوویچ اوګورودنیکوف او مل پلاوي سره لیدنه تر سره کړه:
په دې لیدنه کې د عامې روغتیا وزیر ښاغلي سفیر ته د ښه راغلاست ویلو تر څنګ بیلاروس هیواد ته د خپل وروستي سفر پر مهال د روغتیا په برخه کې د دغه هیواد د روغتیا وزارت له لوري د افغانستان د روغتیایي سیستم سره د هر اړخیزې همکارۍ اړوند ژمنو مننه وکړه او په وینا یې د اړونده موضوعاتو په تعقیب سره به د روغتیا په برخه کې ډیر څه مثبت ولرو.
ښاغلي وزیر د روغتیا په برخه کې د روغتیایي کارکوونکو د تجاربو شریکولو ، د درملو په برخه کې افغانستان ته د درملو را واردولو او د ظرفیت لوړونې دورو اړوند وینا وکړه.
ښاغلي وزیر د خپلو خبرو په جریان کې وویل “ په افغانستان کې اوس مهال د درملو تولیدي فابریکو ، تشخیصیه بنسټونو او روغتونو جوړولو لپاره د پانګونې ښه فرصتونه شتون لري “ او کولای شو په ګډه پرته له خنډونو په دې برخه کې کار وکړو.
د بیلاروس هیواد د افغانستان لپاره نوي سفیر د خپلو خبرو پر مهال وویل ، هڅه یې ده چې د روغتیا په برخه کې د افغانستان له روغتیایي سیستم سره نږدې کار وکړي ، نوموړي همداراز د درملو او طبي تجهیزاتو پر افغانستان ته صادرولو د اسانتیا یادونه وکړه او په وینا یې راتلونکي کې به د اړتیا وړ برخو کې له روغتیا وزارت سره همکاري ولرو.
