د عامې روغتیا وزارت د مالي او اداري چارو مرستیال، ښاغلي ملا بخت الرحمن شرافت بلخ ته د سفر په ترڅ کې د روغتیا نړیوال سازمان او تطبیق کوونکو مؤسسو له مسؤلینو سره غونډه تر سره کړه
په دې غونډه کې د بلخ د عامې روغتیا رئیس، الحاج رحمت الله منصور او د یاد ولایت د عامې روغتیا ریاست مدیريتي ټيم هم ګډون درلود، چې په کې د روانو پروګرامونو، ستونزو، لاسته راوړنو او راتلونکو پلانونو په اړه هر اړخیز بحث او خبرې وشوې
د عامې روغتیا وزارت د مالي او اداري چارو مرستیال، روغتیا برخه کې پر ګډ کار او لا زیاتې همغږۍ ټینګار وکړ او زیاته یې کړه، چې د هېواد د ابادۍ او پر مختګ لپاره باید ټول ګډې هڅې وکړو؛ تر څو د هېواد په رغونه او پر مختګ کې خپل مسؤلیت ادا کړو.
دغه راز، الحاج رحمت الله منصور د عامې روغتیا ریاست او تطبیق کوونکو مؤسسو ترمنځ د همغږۍ پر اهمیت وینا تر سره او زیاته یې کړه، چې د ازموینو، هوکړه لیکونو او نورو اړوندو برخو ته دې جدي پاملرنه وشي او معلومات دې وخت په وخت د عامې روغتیا ریاست سره شریک کړای شي
بل لور، د تطبیق کوونکو مؤسسو مسؤلینو خپلې لاسته راوړنې، تجربې او د پروژو پرمختګونه له ګډونوالو سره شریک او د بشپړې همغږۍ ډاډ یې ورکړ
