د ا.ا.ا د عامې روغتیا وزارت له لوري د خوراکي توکو، درملو او روغتیایي محصولاتو د قاچاق د مخنیوي قانون معرفت غونډه ترسره شوه

په همدې موخه جوړو شویو مراسمو کې د ا.ا.ا د چارو ادارې لوی رئیس، ښاغلي شیخ الحدیث نور الحق انور، د کابېنې غړو، د عامې روغتیا وزیر، ښاغلي مولوي نور جلال جلالي، د وزارت مرستیالانو، عمومي رئیسانو، د بېلابېلو وزارتونو، ادارو او د لایف پرل (Life Pearl) د درملو تولیدي شرکت مسؤلینو او د رسنیو استازو ګډون کړی و.

د ا.ا.ا د چارو ادارې لوی رئیس، ښاغلي شیخ الحدیث نور الحق انور یاد قانون د مرضونو مخنیوي او شفافیت رامنځته کېدو برخه کې مهم وباله او د درملو واردونکو او تولیدونکو ته یې سپارښتنه وکړه، چې کیفیت او معیار ته پاملرنه وکړي، هغه ټینګار وکړ، چې د بې کیفیته درملو واردونکو او تولیدونکو سره هېڅ ډول ترحم په کار نه دی او باید سخته سزا ورکړل شي.

د عامې روغتیا وزیر، ښاغلي مولوي نور جلال جلالي یاد قانون د خوراکي توکو، درملو او روغتیایي محصولاتو د قاچاق مخنیوي برخه کې مهم وباله او پر ښه تطبیق یې ټینګار وکړ.

ښاغلي وزیر زیاته کړه، د دغه قانون په ښه تطبیق سره به د خوراکي توکو، درملو او روغتیایي محصولاتو په کیفیت کې د پام وړ ښه والی راشي، نرخونو به کنټرول او په ټولنه کې به د ناروغیو د کمښت او اقتصادي پیاوړتیا سبب وګرځي.

دغه راز، د عامې روغتیا وزارت د خوړو او درملو مرستیال، ښاغلي مولوي حمدالله زاهد د یاد قانون د اهمیت او ارزښت په اړه هر اړخیزه وینا وکړه او د باکیفیته درملو پر واردولو او تولیدولو یې ټینګار وکړ.