مولوي نور جلال جلالي په کندز کې د ۴۸ میلیونه افغانیو په ارزښت د روغتون د جوړېدو بنسټ کېښود
د افغانستان ا.ا د عامې روغتیا وزیر، ښاغلي مولوي نور جلال جلالي کندز ولایت ته د خپل رسمي سفر په ترڅ کې د ۴۸ میلیونه افغانیو په ارزښت د کلباد عمومي روغتون د جوړېدو ډبره کېښوده
په همدې موخه جوړو شویو مراسمو کې د عامې روغتیا وزیر او مل پلاوي، د کندز مرستیال والي ښاغلي حبیب الرحمن ثاقب، د عامې روغتیا رئیس ډاکټر محمد الله حکمت، د یو شمېر نورو ولایتي ادارو مسؤلینو او د سیمې اوسېدونکو ګډون کړی و
د عامې روغتیا وزیر د اړينو روغتیايي پروژو پلي کېدل د وزارت له مهمو لومړیتوبونو څخه وباله او ويې ويل: هڅه کېږي چې د هېواد په ټولو سیمو کې خلکو ته د درملنې مناسبې اسانتیاوې برابرې شي.
ښاغلي وزير زياته کړه، د دې ډول روغتونونو جوړېدل به د ولسوالیو په کچه خدمتونه پیاوړي کړي او خلکو ته به د اساسي روغتیايي خدمتونو د لاسرسي زمینه برابره کړي.
