له ۵۰ تنو په شرایطو برابرو نوماندانو څخه د فوق تخصص ازموینه واخیستل شوه
د عامې روغتیا وزارت د اکمال تخصص ریاست له لوري د زړه جراحي او زړه داخلې په څانګو کې له ۵۰ تنو په شرایطو برابرو نوماندانو څخه د فوق تخصص ازموینه واخیستل شوه.
د یادې ازموینې لپاره د نوملیکنې بهیر د ازموینې ملې ادارې په همکارۍ ترسره او پوښتنې یې د اکمال تخصص برنامې د استادانو له لوري د قرنطین شرایطو لاندې چمتو او له ۵۰ تنو په شرایطو برابرو متخصصینو څخه په شفاف ډول واخیستل شوه.
په دې ازموینې کې ۲۰ تنه ډاکټران په رسمي ډول د ازموینو ملي ادارې د وېب پاڼې له لارې وړ وپیژندل شول او بل پړاو (Interview) ته یې لاره پیدا کړه او د FMIC روغتون د مسؤلینو په شتون کې ترې د Zoom له لارې د مسؤلې کمېټې په شتون کې Interview واخیستل شوه، چې پایلې به یې د برېښنالیکونو له لارې له ګډونوالو سره شریکې شي.
د یادونې وړ ده، چې د زړه جراحي او زړه داخلې په څانګو کې د فوق تخصص روزنیزې برنامې یاده لړۍ به د FMIC روغتون کې پیل شي.
