د عامې روغتیا وزیر د روغتیا نړیوال سازمان او پولیو له منځه وړلو له مسؤلینو سره پر لیکه مجلس تر سره کړ
د افغانستان اسلامي امارت د عامې روغتیا وزیر، ښاغلي مولوي نور جلال جلالي په خپل کاري دفتر کې د روغتیا نړیوال سازمان له حوزوي مشرې اغلې حنان البلخي ، د افغانستان لپاره د روغتیا نړیوال سازمان له مشر ښاغلي ایډوین سینیزا سلاوډر او د ختیځې مدیترانې حوزې د پولیو له منځه وړلو مسؤول ډاکټر حامد جعفري سره پر لیکه مجلس تر سره کړ
په دې مجلس کې د عامې روغتیا وزیر ښاغلي مولوي نور جلال جلالي د روغتیايي خدماتو د پراختیا ، د روغتیایي پرسونل ارتقاء ظرفیت ، په لرې پرتو سپینو سیمو کې د روغتیایي خدماتو برابرولو او د ساري ناروغیو د مخنیوي څخه یادونه تر سره کړه ، ښاغلي وزیر د عاجلو او لنډ مهالو مرستو تر څنګ د انکشافي او پایښت لرونکو مرستو پر اړتیا او څرنګوالي مفصلې خبرې تر سره کړې او دا یې د روغتیایي سیستم د پرمختګ لپاره اړینې وګڼلې ، بل لور ته د روغتیا نړیوال سازمان د ختیځې مدیترانې حوزې مشرې اغلې بلخي د افغانستان د روغتیايي سیستم سره د نړیوالو مرستو د را جلبولو تر څنګ پر دوامدارو او بنیادي کړنو ټینګار وکړ ، د نوموړې په وینا د افغانستان د روغتیايي سیستم د لا ښه والي په موخه باید لا زیات کار وشي ، او په دې برخه کې یې د هر ډول همکارۍ ډاډ څرګند کړ
