د روغتیایي خدمتونو وړاندې کولو مرستیال د امر بالمعروف او نهي عن المنکر وزارت د تفتیش له رئیس سره وکتل
د روغتیایي خدمتونو وړاندې کولو مرستیال د امر بالمعروف او نهي عن المنکر وزارت د تفتیش له رئیس سره وکتل
پنجشنبه، کب ۵/۱۴۰۰
د عامې روغتیا وزارت د روغتیايي خدمتونو وړاندې کولو مرستیال ډاکتر حبیب الله اخندزاده، نن د یوې ناستې په ترڅ کې د امر بالمعروف او نهي عن المنکر وزارت د تفتیش له رئیس مولوي فضل الربي سره لیدنه او خبرې وکړې.
په دې لیدنه کې په دولتي ادارو کې د اسلامي احکامو په رڼا کې د امر بالمعروف او نهي عن المنکر وزارت د لارښوونو د پلي کولو په اړه بحث او تبادل د نظر وشو.
مولوي فضل الربي په دولتي ادارو کې د اسلامي شريعت تطبيق د دغه وزارت له مهمو غوښتنو څخه وبلل او د عامې روغتيا وزارت له مشرتابه يې وغوښتل چې د عامې روغتيا وزارت د کارکوونکو باندې د دغه وزارت کړنلاره عملي کړي.
هغه همدارنګه وویل: چې ښځینه و لخوا د اسلامي حجاب مراعتول، په ټولو دولتي ادارو کې د نارينه او ښځينه و دفترونو جلا کول، د نارينه وو له خوا د ږیرې نه خریل، د نارینه وو له خوا په ادارو کې د لونګۍ او خولۍ کارول، په جوماتونو کې د جماعت لمونځ ادأ کول، بې حجابه مراجعینو ته په ادارو کې اجازه نه ورکول، د ودونو په تالارونو کې د مخدره توکو نه کارول، د دغه وزارت له مهمو غوښتنو څخه دي.
له بلې خوا، د عامې روغتیا وزارت د روغتیایي خدمتونو وړاندې کول مرستیال ډاکتر حبیب الله اخندزاده د اسلامي شریعت د احکامو د تطبیق او ترویج په برخه کې د امر بالمعروف او نهي عن المنکر وزارت د لارښوونو هرکلی وکړ او ژمنه یې وکړه چې د عامې روغتیا وزارت کې به یې د تطبیق په برخه کې همکاري وکړي.
په ورته وخت کې، د عامې روغتیا وزارت د دفتر رئیس مولوي محمد داوود منصوري وویل: چې په افغانستان کې پخوا غربي کلتور اسلامي فرهنګ اغېزمن او تر خپل تاثیر لاندې راوستی و او اوسمهال به د اسلامي فرهنګ د تطبیق برخه کې هڅې وکړو.
