د هېواد په یو شمېر ولایتونو کې د مور په شیدو د تغذیې نړیوالې اونۍ په مناسبت د پوهاوي پروګرامونه ترسره شول
د بادغیس، غزني، ننګرهار، لغمان، نورستان، پنجشېر، کونړ، سمنګان، هلمند، دایکندي او د هېواد د یو شمېر نورو ولایتونو د عامې روغتیا ریاستونو له لوري د مور په شیدو د تغذیې نړیوالې اونۍ نمانځغونډې تر سره شوې
د دغې اونۍ د نمانځنې موخه د مور په شیدو د تغذیې ملاتړ، ترویج، عامه پوهاوی، د میندو او ماشومانو روغتیا ښه والی او نویو زېږېدلو ماشومانو ته د سالم ژوند د ښه پیل تضمین دی.
د یادو ولایتونو روغتیايي مسؤلین ټینګار کوي، چې د مور شیدې د نوي زېږېدلي ماشوم ټول اړین غذایي مواد برابروي، د بدن دفاعي سیستم يې پیاوړی کوي او په ساري ناروغیو، خوارځواکۍ او ګڼو نورو روغتیايي ستونزو د اخته کېدو خطر کموي.
همدارنګه، شیدې ورکول د میندو لپاره هم ګڼې روغتیايي ګټې لري او د ځینو ناروغیو د خطر د کمېدو ترڅنګ د مور او ماشوم ترمنځ عاطفي اړیکې هم لا پیاوړې کوي.
همدارنګه، د افغانستان ا.ا. د عامې روغتیا وزارت د ملي او نړیوالو همکارو بنسټونو په همکارۍ، په مرکز او ولایتونو کې د عامه پوهاوي پروګرامونه، روزنیزې غونډې او بېلابېل ترویجي فعالیتونه هم ترسره کوي. دغه پروګرامونه د دې لپاره پلي کېږي چې کورنۍ وهڅول شي؛ څو ماشومان د ژوند په لومړیو شپږو میاشتو کې یواځې د مور په شیدو تغذیه کړي او له هغې وروسته تر دوو کلونو پورې د مناسبو مرستندویه خوړو ترڅنګ د مور شیدو ورکولو ته دوام ورکړي.
سربېره پر دې، د عامې روغتیا وزارت د مور او ماشوم د تغذیې له پروګرامونو څخه پر خپل دوامدار ملاتړ، د عامه پوهاوي پر لوړولو او د شیدو ورکولو د مشورتي خدمتونو پر پراختیا ټینګار کوي او له کورنیو، روغتیايي کارکوونکو او ټولو اړوندو بنسټونو غواړي چې د شیدې ورکوونکو میندو په ملاتړ سره، د راتلونکي نسل د روغتیا په ښه والي او په هېواد کې د ناروغیو او خوارځواکۍ د کچې په راکمولو کې اغېزمن رول ولوبوي.
