د سرپل ولایت سنچارک ولسوالۍ د عمومي روغتون (GH) جوړولو د آفر پرانیستې پروسه ترسره شوه
یاده پروسه د عامې روغتیا وزارت د پلان او پالیسۍ لوی ریاست د پلان ګذارۍ او برنامه ریزۍ رئیس ډاکتر عبدالستار صحت، د تدارکاتو، مالي او حسابي، اداري او پلان او پالیسۍ ریاستونو او ۱۰ ودانیزو شرکتونو د استازو په شتون کې ترسره شوه.
د پلان او پالیسۍ لوی ریاست د پلان ګذارۍ او برنامه ریزۍ رئیس وویل: «دغه پروسه په بشپړه توګه له شفافیت څخه برخمنه ده او موږ له هغه شرکت څخه چې بریالی کېږي، تمه لرو چې کارونه په دقیق او ټاکلي وخت د عامې روغتیا وزارت له شرطونو سره سم ترسره کړي؛ ځکه چې دا د عامه ګټو پروژه ده او موږ به یې له چارو څخه نظارت کوو».
بل لور، د ودانیزو شرکتونو استازو ژمنه وکړه، که په دې پروسه کې بریالي شي، د عامې روغتیا وزارت له معیارونو سره سم به عمل ترسره کړي.
د یادونې وړ ده، د عامې روغتیا وزارت د هېواد په ۳۱۸ ولسوالیو کې د عمومي روغتونو جوړولو پلان لري چې د یادې پروسې تدارکاتي چارې دوام لري.
