د سنبلې میاشت کې د خوړو تنظیم، ثبت او جواز ورکولو په برخه کې ګڼ تخنیکي او اجرائیوي فعالیتونه ترسره شول
د عامې روغتیا وزارت د خوړو او درملو معینیت اړوند، خوراکي توکو ته د جواز ورکولو، ثبت او زمينې برابرولو ریاست د ۱۴۰۵ هـ ش کال د سنبلې میاشتې په ترڅ کې د خوړو تنظیم، ثبت، جواز ورکولو او بازار ته د وړاندې کولو برخه کې ګڼ شمېر تخنیکي او اجرائیوي فعالیتونه ترسره کړي دي
په دې موده کې ۶۵ ډوله خوراکي توکي د کیفیت کنټرول لابراتوار ته د ازموینې لپاره او ۵ ډوله نور خوراکي توکي د مایکروبیولوژیکي ازموینو په موخه د فارمسي پوهنځي ته استول شوي دي. همدارنګه، د لابراتواري ازموینو د پایلو له تأیید وروسته، د ۶۹ ډوله اوبو او خوراکي توکو او ۲۷ ډوله ماشومانو خوږو توکو ته خروج اجازه ورکړل شوې ده.
د دې ترڅنګ، ۱۸ ډوله خوراکي توکي د اسنادو نیمګړتیا، غیرمعیاري بستهبندۍ او لېبل او یا هم د لابراتواري ازموینو د نامطلوبو پایلو له امله بېرته مسترد شوي دي. د جواز ورکولو او صادراتو په برخه کې، د خوراکي توکو د تولیدي شرکتونو لپاره ۳ د فعالیت جوازونه او ۱۴ روغتیايي صادراتي تصدیقلیکونه (Export Health Certificates) صادر شوي دي.
سربېره پر دې، د تخنیکي اسنادو د تنظیم په برخه کې د خوړو خوندیتوب قانون او مقررو د پراختیا بهیر هم دوام لري. همدارنګه، د محصولاتو د ثبت، فابریکو ته د جواز ورکولو، بازار ته د خوراکي توکو د وړاندې کولو، حفظالصحې، تأدیبي احکامو او نظارتي چکلېستونو اړوند یو شمېر طرزالعملونه او لارښودونه هم نهایي شوي دي.
