د عامې روغتیا وزارت د رهبرۍ بورډ پنځه ویشتمه غونډه ترسره شوه
دا غونډه د عامې روغتیا وزیر، ښاغلي مولوي نورجلال جلالي په مشرۍ د دې وزارت د مرستیالانو او مرکزي رئیسانو په شتون کې ترسره شوه.
په دې غونډه کې د هېواد په روغتونونو کې د شته ستونزو حل، روغتونونو ته د اړتیا وړ درملو او طبي تجهیزاتو برابرولو، د نویو جوړېدونکو روغتونونو د چارو بهیر د چټکتیا، د ټولو روغتیايي مرکزونو د معلوماتو ثبت، په بېلابېلو برخو کې د ځان بسیاینې، د غیر دولتي مؤسسو د فعالیت او له ناروغانو څخه د فیس اخیستلو او د وزارت د ستراتېژۍ د پلي کېدو لپاره د بودجې د ځانګړي کولو په اړه بحث او خبرې تر سره شوې.
د عامې روغتیا وزیر، د اړوندو مسؤلینو لپاره د لازمو لارښوونو ترڅنګ، په روغتونونو کې د شته ستونزو پر جدي حل، د نویو جوړېدونکو عمومي روغتونونو د چارو بهیر پر چټکتیا، د مسؤلینو له لوري خپلو اړوندو دندو ته پر پاملرنې، د سپارل شویو مسؤلیتونو په ترسره کولو او د نیمګړتیاوو پر له منځه وړلو د ټینګار تر څنګ لارښوونه وکړه، چې د روغتیايي فعالیتونو اړوند چارې دې په نظم، روڼتیا او مسؤلیتپذیرۍ سره پر مخ یووړل شي او د شته ستونزو حل لپاره دې لازم اقدامات ترسره شي.
همدارنګه، په دې غونډه کې د عامې روغتیا وزارت مرستیالانو او مرکزي رئیسانو د مطرح شویو موضوعاتو په اړه خپل نظرونه او وړاندیزونه شریک او ډاډ یې ورکړ، چې د خپلو مسؤلیتونو په برخه کې به لازم اقدامات ترسره کړي.
دغه راز، د اړوندو معینیتونو مسؤلینو په بېلابېلو برخو کې د ترسره شویو چارو د پرمختګ راپورونه وړاندې کړل، چې په کې د تخصصي او ثالثي روغتونونو د درملو او طبي تجهیزاتو د تدارکاتو وضعیت، د نویو روغتیايي بستو د پلي کېدو، په تېر کال کې د عمومي روغتونونو جوړولو چارو د پرمختګ او په روان مالي کال کې د عمومي روغتونونو د تدارکاتو پلانونه او وضعیت شامل وو. سربېره پر دې، د رهبرۍ بورډ په تېره ناسته کې اړوندو مسؤلینو ته د سپارل شویو مسؤلیتونو او په اړه یې د ترسره شویو فعالیتونو راپور هم وړاندې او د وزارت له رهبرۍ سره شریک شو.
