د ساري ناروغیو د مخنیوي په اړه د عامې روغتیا وزارت انلاین ناسته تر سره شوه
د ا.ا.ا د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني په مشرۍ له ولایتي رئیسانو سره د ساري ناروغیو د کنټرول او مخنیوي په موخه انلاین ناسته ترسره شوه
دغه ناسته د روغتیایي خدمتونو وړاندې کولو مرستیال، ښاغلي مولوي عبدالولي حقاني په مشرۍ د ناروغیو د کنټرول او مخنیوي لوی ریاست له لوري ۱۲ ولایتي رئیسانو سره ترسره شوه، چې په کې د ساري ناروغیو د کنټرول او مخنیوي په اړه بحث او خبرې وشوې.
د عامې روغتیا وزارت د روغتیایي خدمتونو وړاندې کولو مرستیال، د ساري ناروغیو د کنټرول او مخنیوي په موخه پر لا ښې همغږۍ ټینګار وکړ او د دغو ناروغیو د مخنیوي لپاره یې په ولایتونو کې د تخنیکي کمېټو له لوري د ناستو منظم ترسراوي سپارښتنې وکړې.
ښاغلي مرستیال دغه راز، د ولایتي رئیسانو وړاندیزونه او ستونزې واورېدې، د حل ډاډ یې ورکړ او له هغوی یې غوښتل، چې د ساري ناروغیو د مخنیوي برخه کې دې د عامه پوهاوي زیاتوالي او وقایې لپاره خپلې هڅې لا زیاتې او د یادو ناروغیو اړوند راپور دې په هرو درېو میاشتو کې د عامې روغتیا وزارت سره شریک کړي.
