د عامې روغتیا وزارت پلان او پالیسۍ لوی ریاست له لوري د پراختیايي پروژو برخه کې د لا زیاتې همغږۍ په موخه ناسته ترسره شوه
یاده ناسته د عامې روغتیا وزیر، ښاغلي مولوي نور جلال جلالي، مرکزي رییسانو او پراختیايي پروژو د مسؤلینو په شتون کې ترسره شوه.
په دې ناسته کې د بودجې او پراختیايي پروژو د مصارفاتو په اړه د عمومي معلوماتو، د پراختیايي پروژو برخه کې د روان ۱۴۰۳ لمریز کال له پیل تر پایه د احتمالي مصارفاتو، د پراختیايي پروژو مسؤلینو له لوري د یو لنډ راپور ورکولو، په پروژه واره توګه د پراختیايي پروژو د مصارفو په اړه د تشریحاتو او د اړوندو ادارو ترمنځ لا زیاتې همغږۍ اړوند بحث او خبرې ترسره شوې.
د عامې روغتیا وزیر، ښاغلي مولوي نور جلال جلالي له اړوندو مسؤلینو وغوښتل، چې خپلو مسؤلیتونو او زیاتې همغږۍ ته په پاملرنې شته بودجه د پراختیايي پروژو برخه کې په اغېزمنه توګه وکاروي؛ ترڅو هېوادوالو ته په معیاري توګه روغتیايي خدمات وړاندې شي.
بل لور د روغتیا په برخه کې د پراختیايي پروژو مسؤلینو د مصرف شوې بودجې په اړه د راپورونو د تشریح کولو سربېره خپلې ستونزې او وړاندیزونه د روغتیا وزارت له رهبرۍ سره شریک کړل او د دوه اړخیزې همکارۍ ډاډ یې څرګند کړ.
