د عامې روغتیا وزارت د رهبرۍ بورډ ناسته ترسره شوه
یاده ناسته د عامې روغتیا وزیر، ښاغلي مولوي نور جلال جلالي په مشرۍ د وزارت مرستیالانو او رئیسانو په شتون کې ترسره شوه، چې په ولایتونو کې د روغتیايي خدمتونونو له بهیر څخه په ګډ نظارت، د ولسوالیو په کچه روغتونونو جوړېدو برخه کې د چارو په چټکتیا، د عامې روغتیا وزارت او کار او ټولنیزو چارو وزارت ترمنځ په ځینو برخو کې د ګډ هوکړه لیک، نیمه پاتې پروژو د کارونو په تکمیل، لا زیاتې همغږۍ او ګڼو نورو موضوعاتو اړوند په کې بحث او خبرې ترسره شوې.
د عامې روغتیا وزیر، د پورته ذکر شویو موضوعاتو برخه کې بېلا بېلې تخنیکي کمېټې وګمارلې، ترڅو په یادو برخو کې لازمې چارې په ټاکلي وخت او سمه توګه ترسره شي.
دغه راز، د روغتیا وزارت مرستیالانو او مرکزي رئیسانو د هغه مسؤلیتونو راپور وړاندې کړ، چې د رهبرۍ شورا په تېره ناسته کې دوی ته سپارل شوي وو او ټینګار وشو چې په اړه یې پر ټاکلي وخت اجراات وشي.
