زابل ولایت کې درې بنسټیز او یو فرعي روغتیايي مرکز روغتیايي خدمات پیل کړ
د زابل ولایت شملزو، ارغنداب، شاجوی او دایچوپان ولسوالیو په لرې پرتو سیمو کې درې بنسټیز او یو فرعي روغتیايي مرکز بیا فعال او د خلکو لپاره یې روغتیايي خدمات پیل کړ.
په همدې موخه جوړو شویو مراسمو کې د زابل مرستیال والي مولوي محب الله حماس، د عامې روغتیا رئیس ډاکټر میرویس افغان او ګڼ شمېر نورو مسؤلینو ګډون کړی و.
په یادو مراسمو کې د زابل عامې روغتیا رئیس ډاکټر میرویس افغان وویل: " د یادو روغتیايي مرکزونو په بیا فعالېدلو سره به د دې سیمو زرګونه اوسېدونکو ته چې وړاندې له روغتیايي خدماتو بې برخې وو، روغتیايي خدمات وړاندې کېږي".
نوموړي دغه راز زیاته کړه، چې یادو روغتیايي مرکزونو ته (۱۴۵) قلمه درمل او نور اړین وسایل ورکړل شول؛ ترڅو خلک له روغتیايي خدماتو برخمن شي.
