د افغانستان اسلامي امارت د عامې روغتیا وزیر، ښاغلي ډاکټر قلندر عباد د ملګرو ملتونو د پرمختیايي پروګرام (UNDP) له استازې سره لیدنه ترسره کړه
په دې لیدنه کې د ساري ناروغیو پروګرامونو د پیاوړتیا په ځانګړي ډول د ملاریا، توبرکلوز او اچ آی وي په اړه بحث او خبرې ترسره شوې.
د عامې روغتیا وزیر، ښاغلي ډاکټر قلندر عباد په هېواد کې د ساري ناروغیو کنټرول او مخنیوی خورا اړین وګاڼه او ویې ویل، چې په دې برخه کې هڅې روانې دي.
همداراز د ملګرو ملتونو د پرمختیايي پروګرام استازې په روغتیايي برخه کې د دې ادارې د همکاریو د دوام په اړه خبرې ترسره او د ملاريا، توبرکلوز او اچ آی وي ناروغیو د کنټرول پروګرامونو له ګلوبل فنډ سره د یوځای کېدو غوښتونکی شو.
د عامې روغتیا وزیر، ښاغلي ډاکټر قلندر عباد د روغتیايي خدمتونو د تطبیق کوونکو مؤسسو او له عامې روغتیا وزارت سره د نورو نړیوالو همکارو ادارو په روڼتیا او حساب ورکونې ټینګار وکړ او د دې برخې تخنیکي مسئولینو ته یې هدایت وکړ؛ ترڅو د یادو پروګرامونو د یوځای کېدو د څرنګوالي لپاره کار ترسره او د پیاوړتیا لپاره یې یو غوره حل لاره ولټوي.
