په کندهار ولایت کې له یو شمېر روغتیايي مرکزونو څخه نظارت تر سره شو
د عامې روغتیا وزارت د مور او ماشوم د روغتیایي حقوقو د ملاتړ ریاست مسؤولینو کندهار ولایت ته د درې ورځني سفر په ترڅ کې د سیمه ییز روغتون نسایي او ولادي څانګې، د ماشومانو او نويو زېږېدلو کوچنیانو څانګې، د یخ کاریز بنسټیز روغتیايي مرکز او د کندهار ولایت د شپږمې ناحیې د مور او ماشوم د روغتیایي مرکز څخه لیدنه تر سره کړه.
د دې لیدنې په ترڅ کې د مور او ماشوم د روغتیایي حقوقو د ملاتړ څانګې مسؤولینو په یادو مرکزونو کې د مثبتو کړنو څخه؛ لکه پاک او منظم چاپیریال ، د دندې پر مهال د کارکوونکو منظم شتون، طبي اخلاقو ته پاملرنه، د میندو او ماشومانو لپاره د ۲۴ ساعته خدماتو وړاندې کول، د ناروغانو د لېږدولو لپاره د امبولانسونو شتون او په غوره توګه ورته د بېړنیو خدماتو وړاندې کولو ستاینه وکړه.
سربېره پر دې د روغتیایي مرکزونو او سیمه ییز روغتون د بېلا بېلو برخو څخه د لیدنې پر مهال مسؤلینو ته د ستونزو حل په موخه لازمې سپارښتنې تر سره شوې ، مسؤولینو د مور او ماشوم د روغتیايي خدماتو د ښه والي په موخه یو شمېر نور مهم موضوعات هم د اړوندو مسؤلینو سره شریک کړل؛ تر څو ناروغانو ته معیاري روغتیایي خدمات وړاندې شي.
