د پروان ولایت د عامې روغتیا مخکینی رئیس، مولوي امدادالله امداد د کاپیسا د عامې روغتیا د رئیس په توګه او د کاپیسا ولایت د عامې روغتیا مخکینی رئیس، ډاکټر نیاز محمد مخلص د پروان د عامې روغتیا رئیس په توګه وګمارل شول
د ا.ا.ا د مشرتابه او د عامې روغتیا وزارت د لزوم دید پر بنسټ، دا رئیسان د عامې روغتیا وزارت د مقام دفتر لوی رئیس، ښاغلي الحاج شیخ محمد طاهر (حلیم) له لوري د یوې غونډې په ترڅ کې معرفي شول.
ښاغلي شیخ محمد طاهر (حلیم) د نړۍ په نظامونو کې تغیر او تبدیل، په ځانګړې توګه د ا.ا.ا په نظام کې د ښې حکومتولۍ یو اصل وګاڼه او ویې ویل: «د مشرتابه د لزوم دید پر بنسټ، نوموړي رئیسان کولای شي، چې د عامې روغتیا وزارت د وړاندیز او د ا.ا.ا د ریاست الوزراء عالي مقام د منظورۍ سره سم روغتیا سکټور کې خپلې نوې دندې په منظم ډول پر مخ یوسي.»
دغه راز، د عامې روغتیا وزارت د طبي شورا لوی رئیس، ډاکټر فقیر محمد (زیار) د خپلې وینا پر مهال، د نویو رئیسانو معرفي کول روغتیا برخه کې یو بنسټیز کار وباله او زیاته یې کړه: «موږ دواړو رئیسانو ته د خدای تعالی څخه په چارو کې د بریالیتوب هیله څرګندوو.»
