د پروان ولایت د عامې روغتیا ریاست له لوري شاوخوا ۱۲ ټنه له نېټې تېر او بې کیفیته درمل او مواد وسوځول شول
دغه درمل او بې کیفیته مواد د پروان د عامې روغتیا ریاست د څارنې او پلټنې امریت له لوري د چاریکار ښار او ولسوالیو له درملتونونو او پلورنخو څخه راټول شوي وو، چې د استخباراتو، امنیې قوماندانۍ، ښاروالۍ او نورو اړوندو ادارو د استازو په حضور کې وسوځول شول.
د پروان ولایت د عامې روغتیا رئیس، ډاکټر نیاز محمد مخلص، د دې ریاست د ګډې کمېټې د جوړېدو په اړه وویل: «دغه ګډه کمېټه چې د امارت د بېلابېلو ادارو له استازو جوړه شوې ده، موخه یې د بېکیفیته موادو د تولید او بې کیفیته خدماتو وړاندې کولو مخنیوی دی. یاده کمېټه د پروان ولایت د عامې روغتیا ریاست له مشرتابه سره په همکارۍ توانېدلې ده، چې شاوخوا ۱۲ ټنه له نېټې تېر او بې کیفیته درمل او مواد له مرکز او بېلابېلو ولسوالیو راټول کړي، چې نن یې د سوځولو شاهدان یو.
