د عامې روغتیا وزیر، ښاغلي ډاکټر قلندر عباد د اندونیزیا سفیر، ښاغلي بودي رحمت سوریا سپوټرا سره لیدنه ترسره کړه
د عامې روغتیا وزیر، ښاغلي ډاکټر قلندر عباد د اندونیزیا سفیر، ښاغلي بودي رحمت سوریا سپوټرا سره لیدنه ترسره کړه
په دې لیدنه کې چې د روغتیا نړیوال سازمان استازي، ډاکټر خوشحال زمان، د پولیو د له منځه وړلو بېړني ملي عملیاتي مرکز رییس، الحاج ډاکټر عبدالقدوس بریالي او ګڼ شمېر نورو ریاستونو مسؤلینو هم شتون درلود د روغتیا په برخه کې د دواړو هېوادونو تر منځ په دوه اړخیزو همکاریو، د افغان روغتیايي کارکوونکو د ظرفیت لوړلو او ګڼو نورو روغتیايي موضوعاتو اړوند بحث او خبرې ترسره شوې.
د عامې روغتیا وزیر، ښاغلي ډاکتر قلندر عباد له افغانستان سره د روغتیا په برخه کې د اندونیریا هېواد د همکاریو قدرداني تر څنګ د یاد هېواد له لوري د پولیو (ګوزڼ) ناروغۍ د لس میلیونه دوزه واکسین د مرستې مننه وکړه او د افغان روغتیايي کارکوونکو د روزنې، د درملو او طبې تجهیزاتو په برخه کې د اسانتیاوو د رامنځته کولو او نورو روغتیايي برخو کې د دې هېواد د لا ډېرو مرستو غوښتونکی شو.
له بلې خوا د اندونیزیا سفیر له افغانستان سره د دې هېواد د همکاریو پر دوام ټینګار وکړ او د روغتیا په برخه کې یې د لا زیاتو همکاریو ډاډ ورکړ.