د عامې روغتیا وزارت معالجوي طب لوی ریاست له لوري په روغتونونو کې د تشخیصیه برخې خدمتونو د ښه والي په موخه ناسته ترسره شوه
په دې ناسته کې د معالجوي طب لوی رئیس، ډاکټر وحدت الکوزي وویل:( په روغتونونو کې باید تشخیصیه خدمتونه لا معیاري شي، چې دې موخې ته د رسېدو لپاره زیات کار او هڅو ته اړتیا ده).
ډاکتر وحدت زیاته کړه، په روغتونونو او مرکزونو کې د تشخیصیه خدمتونو ښه والي لپاره اړتیا ده، چې اړوندو مسؤلینو سره په میاشت کې یو ځل ناسته ترسره، ستونزې یې واورېدل شي او د حل لپاره یې اړین اقدامات وشي.
همداراز، د تشخیصیه خدمتونو رئیس، داکټر ناصر احمد حنفي ګډونوالو ته د یاد ریاست فعالیتونو او لاسته راوړنو په اړه معلومات ورکړل او ویې ویل: د تشخیصیه خدمتونو ښه والي لپاره مهمه ده، چې د هېواد په کچه ټولو روغتونونو او مرکزونو کې متوازنو تشخیصیه خدمتونو ته د اسان لاسرسي زمینه برابره شي.
نوموړي زیاته کړه، د تشخیصیه خدمتونو له منابعو څخه اغېزمنه ګټه اخیستنه او له ناسمې ګټې اخیستنې څخه مخنیوی، په روغتونونو او مراکزو کې د اړتیا له مخې د لابراتواري او راډیولوژي خدمتونو ډلبندي، له نړیوالو معیارونو سره سم په ټول هېواد کې د تشخیصیه خدماتو پیاوړتیا، روغتیايي سیسټم ظرفیت لوړول او ورته نور مهم موضوعات هغه څه دي، چې د تشخصیه خدماتو په پیاوړتیا کې اساسي رول لري.
